Tuesday, January 4, 2011

អនុ​សំវ​ច្ឆ​រមហាស​ន្និបាត​មន្ត្រី​សង្ឈ​ទូទាំង​ប្រទេស​លើក​ទី​១៩​បាន​បិទ​នៅថ្ងៃនេះ​

អនុ​សំវ​ច្ឆ​រមហាស​ន្និបាត​មន្ត្រី​សង្ឃ​ទូទាំងប្រទេស​លើក​ទី​១៩ បាន​ប្រព្រឹត្ត​ទៅ​រយៈពេល​២ ថ្ងៃ គឺ​ថ្ងៃ​ទី​០៣-០៤​ខែ​មករា​ឆ្នាំ​២០១១ ដោយ​មាន​ការ​និមន្ត​ចូលរួម​ពី​ព្រះ​មេគណ ព្រះ​អនុគណ និង​ព្រះ សង្ឃ​គ្រប់​អង្គ និមន្ត​មកពី​បណ្តា​រាជធានី​-​ខេត្ត នៅ​ទូទាំង​ព្រះរាជាណាចក្រ​កម្ពុជា​។​​មហាសន្និបាត​នេះ​ធ្វើឡើង​ដើម្បី​បូកសរុប​លទ្ធផល​នៃ​ការអនុវត្ត​សង្ឃ​ប្រកាស​របស់​អនុ​សំវ​ច្ឆ​រ​​មហាសន្និបាត​មន្ត្រី​សង្ឃ ក្នុង​ឆ្នាំ​កន្លងទៅ និង​ពិភាក្សា ពិគ្រោះ យោបល់​លើ​ការងារ​ព្រះពុទ្ធសាសនា នាពេល​បច្ចុប្បន្ន និង​លើក​ទិសដៅ​បន្ត សំដៅ​ពង្រឹង​ការអនុវត្ត​រចនា សម្ព័ន្ធ​ដឹកនាំ​គ្រប់គ្រង ពង្រឹង​លិខិត​បទដ្ឋាន​គតិយុត្ត ដែល​មាន​ស្រាប់​ធ្វើអោយ​វិស័យ​សាសនា​មាន​ការរីកចំរើន សក្តិសម​ជា​ទី​គោរពបូជា​របស់​ពុទ្ធបរិស័ទ និង​ពង្រឹង​គុណភាព​ពុទ្ធិកៈសិក្សា ដើម្បី​អភិវឌ្ឍ​ធនធាន បុព្វ​ជិត ឱ្យ​កាន់តែ​មាន​សុក្រឹតភាព និង​គុណភាព​ខ្ពស់​។​​នៅឯ​សាលសន្និសីទ​ចតុមុខ រាជធានី​ភ្នំពេញ សម្តេច​អគ្គ​មហា​ធម្ម​ពោធិ​សាល ជា ស៊ីម ព្រះរាជ តំណាង​ដ៏​ខ្ពង់ខ្ពស់​ព្រះករុណា​ព្រះបាទ​សម្តេចព្រះ​បរមនាថ នរោត្តម សីហ​មុនី ព្រះមហាក្សត្រ​នៃ​ព្រះ រាជាណាចក្រ​កម្ពុជា បាន​មានប្រសាសន៍​កោតសរសើ​រ​ដោយស្មោះ​ដោយ​បាន​ឃើញ​នូវ​កំលាំង សាមគ្គី​ធម៌ ដ៏​ល្អប្រសើរ​របស់​ពុទ្ធសាសនិក​ជន និង​ព្រះសង្ឃ​ទាំង​ពីរ​គណៈ ។​​សម្តេច​ព្រះរាជតំណាង បាន​មានប្រសាសន៍ថា នៅ​តាម​ទី​វត្ត​អារាម យើង​ឮសូរ​តែ​សម្លេង​ធម៌ ដែល​រំលឹក​ដល់​គុណ​ព្រះពុទ្ធសាសនា និង​បានប្រែក្លាយ​ទៅជា​ដំបូន្មាន ជួយ​អប់រំ​កូនចៅ ឱ្យ​ប្រតិបត្តិ​តែ​អំពើ​ល្អ ដែល​ជា​ការរួមចំណែក​កសាង​មនុស្ស​ល្អ​របស់​សង្គមជាតិ​។ ​ទន្ទឹម​នឹង​ការរីកចំរើន ក៏​នៅ​មាន​បញ្ហា​ជាច្រើន ដែល​ត្រូវ​បន្ត​ដោះស្រាយ​។ ការពិគ្រោះ​ពិភាក្សា លើ​បច្ចុប្បន្នភាព​ដែល​មហាសន្និបាត​នឹង​លើក​ឡើង​គឺ​ជា​ប្រការ​ដ៏​សមស្រប​ហើយ​បន្ទាប់មក ត្រូវមាន​វិធី​ដោះស្រាយ​តាម​លំដាប់លំដោយ​ប្រកប​ដោយ​ប្រសិទ្ធភាព​ខ្ពស់​។ សម្តេច​បាន​មាន ប្រសាសន៍​ថាៈ​ការពង្រឹង​គុណភាព​លើ​អភិបាលកិច្ច​គ្រប់​លំដាប់​ថ្នាក់​ក្នុង​ជួរ​មន្ត្រី​សង្ឃ​ត្រូវ​ផ្សារភ្ជាប់ នឹង​បច្ចេកវិទ្យា​ទំនើប ដើម្បី​អោយ​កិច្ចការ​ពុទ្ធ​សាសនា​មាន​សណ្តាប់ធ្នាប់​ល្អ និង​ធានាបាន​នូវ សាមគ្គីភាព​ក្នុង​ជួរ​ពុទ្ធបរិស័ទ​។ ​ការយកចិត្តទុកដាក់​ចំពោះ​ពុទ្ធិកៈ​សិក្សា​ក៏​ជា​ការចាំបាច់​យ៉ាងសំខាន់ ដែល​ត្រូវ​ពង្រឹង និង​ពង្រីក​នៅ​គ្រប់​ទីកន្លែង​ដ៏​សមស្រប​។ គ្រប់ៗ​គ្នា​ប្រកាន់​យក​ព្រះពុទ្ធ​ឱវាទ​ធ្វើ​ជា​ប្រទីប បំភ្លឺ​ផ្លូវ​សំរាប់​អប់រំ​ចរិយា​ធម៌ និង​ស្មារតី​ដោយ​ជំ​រុះ​ចោល​នូវ​គំនុំ ការ​ច្រណែន​និន្ទា អំពើហឹង្សា៘​​លោក​មិន ឃិន រដ្ឋមន្ត្រីក្រសួង​ធម្មការ និង​សាសនា បាន​មានប្រសាសន៍ថាៈ​អនុ​សំវ​ច្ឆ​រ​មហាសន្និបាត​មន្ត្រី​សង្ឃ​លើក​ទី​១៩​ឆ្នាំនេះ ប្រព្រឹត្ត​ទៅ​ដើម្បី​បូកសរុប​លទ្ធផល​នៃ​ការអនុវត្ត​សង្ឃ ប្រកាស​របស់​អនុ​សំវ​ច្ឆ​រមហាស​ន្និបាត​មន្ត្រី​សង្ឃ​ក្នុង​ឆ្នាំ​កន្លងទៅ​និង​ពិភាក្សា​ពិគ្រោះ​យោបល់ លើ​ការងារ​ព្រះពុទ្ធសាសនា នាពេល​បច្ចុប្បន្ន​។​​មហាសន្និបាត​ក៏បាន​លើក​ទិសដៅ​បន្ត​សំដៅ​ពង្រឹង​អនុវត្តរ​ច​នា​សម័ន្ធ​ដឹកនាំ​គ្រប់ គ្រង ពង្រឹង​លិខិត​បទដ្ឋាន​គតិយុត្ត​ដែល​មាន​ស្រាប់​ធ្វើអោយ​វិស័យ​សាសនា​មាន​ការរីកចំរើន សក្តិសម​ជា​ទី​គោរពបូជា​របស់​ពុទ្ធ​បរិ​- ស័​ទ និង​ពង្រឹង​គុណភាព​ពុទ្ធិកៈ សិក្សា​ដើម្បី​អភិវឌ្ឍ ធនធាន​បុព្វ​ជិត ឱ្យ​កាន់តែ​មាន​សុក្រឹតភាព និង​គុណ ភាព​ខ្ពស់​៕

No comments: