Tuesday, March 30, 2010

ព្រះ​ពោធិសត្វ​អ​មិតភៈ​

ព្រះ​ពោធិសត្វ​អ​មិតភៈ​

​តាម​លក្ខណៈ​ទូទៅ គេ​ឆ្លាក់​ព្រះ​ពោធិសត្វ​អង្គ​នេះ ក្នុង​ឥរិយាបថ​អង្គុយ​សមាធិ នៅ​ចំ​កណ្ដាល​ផ្នួងសក់​នៃ​ព្រះ​អវលោកេស្វរៈ ដែល​ទ្រង់​ប្រថាប់​ឈរ ដោយ​មាន​ដៃ ២ ទៅ ១០ ។ តាម​គម្ពីរ​តន្ត្រៈ ព្រះ​ពោធិសត្វ អមិតភៈ​គង់ប្រថាប់​នៅ​ទិស​ខាងលិច​នៃ​សួគ៌ា ។​
​ ​ការ​ឆ្លាក់​ព្រះ​ពោធិសត្វ​អមិត​ភៈលើ​ព្រះ​កេស​ព្រះ​ពោធិសត្វ​អ​វ ​លោ​ស្វរៈ ដែល​តំណាងឲ្យ​ព្រះបាទ​ជ័យវរ្ម័ន​ទី​៧ ឬ​ព្រះ​កេស​ព្រះ​នាង​ប្រាជ្ញា​បា​រមិតា តំណាង​ឲ្យ​ព្រះនាង​ឥន្ទ្រ​ទេវី ព្រោះ​ព្រះ​បដិមា​ទាំងនោះ​រមែងតែងតែ​សង្គ្រោះ​សត្វលោក ដែល​មាន​ទុក្ខទោស ដោយ​ផ្ដល់​នូវ​សេចក្ដីសុខ សេចក្ដីចំរើន ។ ដូច្នេះ​ហើយ​យើង​ឃើញថា ព្រះ​ពោធិសត្វ​អ​មិតភៈ មាន​ប្រជាប្រិយភាព​យ៉ាង​ខ្លាំងក្លា​អស្ចារ្យ ក្នុង​សង្គម​ពី​សម័យ​បុរាណ ។​

ចម្លាក់ព្រះកេស ព្រះពុទ្ធអង្គ និង ព្រះកេសព្រះបាទជ័យវរ្ម័នទី ៧ ដែលមានចម្លាក់ព្រះពោធិសត្វអមិតភៈលើកភ្នួងសក់ (ឯកសារ សារមន្ទីរហ្គីមេ)

​ ​ដោយ​ពិត​ទៅ​ចម្លាក់​ទាំងនោះ បាន​បង្ហាញ​ពី​ថ្វីដៃ​ដ៏​ប៉ិនប្រសព្វ​របស់​អ្នកប្រាជ្ញ​ខ្មែរ​ខាង​សាសនា ក្នុង​ការបង្កើត​រូបមន្ត​សំយោគ​ថ្មី ដែល​ពុំ​ធ្លាប់​មាន​ពីមុនមក គេ​អាច​ធ្វើឲ្យ​ព្រះមហាក្សត្រ ឬ​ព្រះរាជ​នី ឲ្យក្លាយ​ទៅ​ជា​មហា​វីរបុរស រហូត​ដល់​ព្រះអាទិទេព​ថែមទៀត​ផង ។ ទាំងអស់នេះ គឺជា​ទេពកោសល្យ​ខ្ពស់ និង​វិធីសាស្ត្រ​មួយ​សម្រាប់​ព្រះបាទ​ជ័យវរ្ម័ន​ទី​៧ ក្នុង​ការបង្រួបបង្រួម​ជាតិ​ខ្មែរ​ជា​ធ្លុង​មួយ ។ កុំភ្លេចថា ចម្លាក់​ព្រះ​ពោធិសត្វ​ទាំងនោះ​ត្រូវ​ចែកចាយ​ទូ​ទាំង​ដែនដី​ខ្មែរ សម្រាប់​ជាទី​គោរព​សក្ការៈ ។​
​ ​ព្រះភ័ក្ត្រ​ស្លូតបូត​ញញឹម​ស្រស់ប្រិមប្រិយ៍ នៅពេលដែល​គេ​គយគន់​ព្រះ​បដិមា​ពុទ្ធ​រាជ​នោះ​ម្ដងៗ ដែល​គេ​ចាត់ទុកថា ជា​ប្រភព​នៃ​គុណធម៌ គេ​មិន​អាច​ទប់ចិត្ត​មិន​ឲ្យ​ស្រលាញ់​បេតី​ឡើយ ។​
​ ​សរុបមក គឺ​លក្ខណៈ​ដ៏​វិសេសវិសាល​ទាំងអស់នេះ​ហើយ ដែល​បាន​ទាក់ទាញ​ការស្រលាញ់​គោរព​ប្រមុខ​ដឹកនាំ ពី​សំណាក់​ប្រជានុរាស្ត្រ​គ្រប់​មជ្ឈដ្ឋាន​ក្នុងសង្គម ដែល​ជា​គ្រឹះ​ដ៏​រឹងមាំ នៃ​អត្តសញ្ញាណ​ជាតិ​ខ្មែរ​យើង ៕​ (​ម​.​ត្រា​ណេ​)ដកស្រង់ពីECN

No comments: